Escota musicala

Dins aquel cortmetratge original, seguissèm un pichon can dins sos sòmis; vaga dins d'univèrs diferents, cadun tan estranh coma lo seguent. Podèm notar que cada cambiament d'univèrs s'acompanha d'un cambiament de musica.

D'en primièr, far escotar la musica als enfants sens agachar lo film. Daissatz-los exprimir lors emocions a la seguida d'aquela primièra escota. Fasètz una segonda escota, en prenent de pausas a cada cambiament d'univèrs. Los escolans pòdon reconéisser certans sons, instruments, o certans "ambients":

• Una introduccion que nos mena dins los sòmis del can (podèm imaginar qu'es la fasa ont s'endormís). Après los crèdits (xilofòn), ausissèm de musica sens pulsacion que contrasta amb la musica seguenta.
• A la 31a segonda, lo can comença sa caminada (lo sòmi comença). La musica es ritmica e pegadiça; camina, en seguint lo pols. Pas res a veire amb la musica precedenta mas trobam lo xilofòn dels crèdits.
• A l'entorn de la 40ena segonda, dobrís una pòrta e dintra dins lo primièr univèrs. Trobam la meteissa melodia mas la musica es mai lenta e mai doça. Puja l'escala e sauta de la taula de plonjada dins lo bol de sopa. Tornam ausir lo xilofòn abans lo saut. Quand sauta e travèrsa los nívols, ausissèm lo bruch de sa casuda.
• Quand aterra dins lo liquid, la musica ven amortida e reconeissèm l'atmosfèra de l'environament sota l'aiga. Quand torna far la superfícia, la musica es mai fòrta, mai clara. Ausissèm lo bruch de l’aiga, podèm imaginar las ondas.
• Puèi, sortís del bòl e s'acaba sus la taula d'un restaurant japonés. La musica plan particulara qu’acompanha aquel univèrs nos fa pensar a l’Asia.
• Quand se tròba dins l’avion, la musica s’arrèsta e los sons que nos remembran l’avion son presents.
• Torna dins lo restaurant e la meteissa musica torna tanben.
• Puèi se tròba dins una fusada (podètz reconéisser lo bruch).
• E fin finala desbarca dins una vila (pren lo tren, se tròba al mitan de bastiments, dins un apartament e acaba son viatge dins la carrièra). La musica es mens clara dins aqueles darrièrs univèrs que son comuns a la vila.

Aprèp aquel trabalh d’escota, mostratz lo filme als enfants. Fasètz de ligams amb las primièras observacions, veire se las ipotèsis son verificadas, afinar l'analisi amb los imatges. Soslinhar que cada univèrs a ​​sa pròpria musica.