Desèrts

Per manténer una vision globala, los documents utilizats seràn de mapas a l'escala de la Tèrra visualizadas interactivament amb Google Earth (version Pro, gratuita). Utilizarem la vista per defaut (redusida a sonque d'informacions pertinentas), a la quala podèm apondre de cartas especificas. Son de fichièrs que pòdon èsser dobèrts dins Google Earth per obténer un "calc" de donadas que se superpausa sus la basa fotografica del logicial (Vejatz las referéncias çai-jos.)

Pòt èsser util de començar per introduire lo logicial e las tecnicas que ne depend: collecta de donadas per satellit (Google Earth utiliza tanben de fòtos aerianas). Deuriam insistir sul ròtle d'aquela vision "extèrna" a distància de la Tèrra per comprene los ligams que religan d'environaments e d'umans que son geograficament luènhs, es a dire una vision globala de la planeta caracteristica del mond contemporanèu.

La primièra etapa consistís a observar lo glòbe tal coma es per localizar los desèrts, definits a primièra vista coma de luòcs pas ocupats per l'òme. Lo principi es de cercar de signes d'aucupacion umana e de reflexionar sus la basa dels païsatges, que la morfologia n'observam a granda escala (colors, estructuras). Lo desplaçament e lo zoom permeton d'esclarzir o de refusar las idèas (destriar las estructuras naturalas de las estructuras artificialas, per exemple). Lo ròtle del professor es de guidar l'interpretacion dels signes. Per esclarzir l'observacion, se pòt superpausar una mapa de cobèrta terrèstra (tipe de vegetacion, zònas cultivadas, zònas artificialas, etc.).

Podèm conclure aquela primièra recèrca intuitiva en verificant amb una mapa de densitat de populacion. A la fin d'aquela etapa, los enfants deurián aver qualques nocions sus la relacion entre los environaments naturals e la preséncia umana (lo ròtle de las contraintes de l'environament natural) e tanben una lista corta d'airals ont los umans son pas presents.

La segonda etapa consistís a se centrar sus aquelas zònas e lors caracteristicas ecologicas, en particular lo ligam entre la preséncia d'aiga e la preséncia de vida. Aquò's lo sens scientific del mot desèrt. De mapas d'avaloracion de l'ariditat son disponibles. Per la cartografia de la vida, lo problèma es mai complicat, mas qualques mapas globalas especializadas, per avalorar la biodiversitat o la biomassa, pòdon èsser utilizadas.

L’idèa es de verificar que quitament dins de zònas qu’ocupan pas los umans, la vegetacion o la vida animala pòdon encara èsser presentas. L'ocean es evidentament l'exemple paradigmatic, en particular perque començam pas que de mesurar sa biodiversitat. Aital, fòrça paucas zònas del glòbe son vertadièrament abioticas (sens la preséncia de vida organica): i a pas que de desèrts glacials, ont

l'aiga es presenta, mas en forma gelada.