Descriure la vila

Abordar la question dempuèi diferents punts de vista. D'en primièr, per exemple, podètz abordar lo tèma de la percepcion de la vila del punt de vista de son ritme global. Es relaxant o puslèu cansant e per quinas rasons? Demandatz als enfants de descriure la vila dins lo filme e de la comparar amb la vila o lo vilatge ont vivon o amb d'endreches ont son ja estats.

Puèi, per anar dins los detalhs, podètz discutir amb los enfants de l’environament sonòr de las vilas. Perqué pas començar per lor demandar la lista dels sons diferents qu'ausissèm al començament del filme (l'environament sonòr es fòrça ric, la musica, lo bruch de la fola, las maquinas, etc.) De la meteissa manièra, lor podètz demandar los bruches qu'ausisson prèp d'eles e los que lor agrada o qu'agradan mens.

Un angle interessant tanben es aquel del solelh e de la lutz. Dins lo filme, vesèm pas jamai de lutz dirècta; dins nòstras vilas, segon las diferentas nautors dels bastiments, lo solelh es mai o mens amagat.

Podètz tanben mencionar la preséncia de vegetacion qu'ocupa una plaça preponderanta dins nòstra percepcion de nòstras vilas coma o illustran las 2 fòtos sul fuèlh.

La question de l’animacion d’una vila es tanben un punt de vista interessant.

Totes aqueles diferents aspèctes e punts de vista sus la vila deurián permetre als enfants de comprene e de comunicar sus çò que lor agrada o pas dins una vila, de comprene perqué se sentisson plan o pas dins quin quartièr... (environament sonòr, vegetacion, calma o bolegadís...)